Kommer bestaan oor die feit dat vee en plaasdiere vir groot hoeveelhede waterverbruik blameer word, sê die Suid-Afrikaanse Vereniging vir Veekunde in ‘n verklaring.

Die organisasie sê dat die bewerings op onbevestigde aannames gegrond is.  

Volgens die organisasie, kan slegs herkouers soos skape, beeste en bokke, plantegroei met ‘n hoë veselinhoud, in hoë-gehalte proteïnbronne vir menslike gebruik omskakel.

Die SAVV sê verder dat aktiviste, wat dikwels niks van veeproduksie weet nie, gereeld verbruikers aanmoedig om minder vleis te eet, ondanks die feit dat verskeie ander sektore, wat ‘n groter bydrae maak tot kweekhuisgasse en waterbenutting, volgens die organisasie, gerieflikheidshalwe geïgnoreer word.

Die sektore sluit in vervoer, mynbou, nywerheids- en verwerkingsektore.

Die SAVV sê ook dat die toename in die wêreldbevolking ‘n verdere bydrae maak tot groter waterverbruik, wereldwyd.


Verklaring verskaf