Local News
Vierfontein-boer moet geopereer word ná plaasaanval─── 15:32 Tue, 22 Jul 2014
Dirk Kok
Klerksdorp - Die 81-jarige Buks Swanepoel wat in ’n plaasaanval by Vierfontein in die Vrystaat aangerand is, moeyt geopereer word vir skedelbreuk.
Sy seun, Casper, sê hulle is baie bekommerd oor sy toestand. Hy sou vanoggend ’n operasie in die Life Anncron-kliniek in Klerksdorp ondergaan. Dit is uitgestel tot vanmiddag en toe weer tot môre-middag.
Twee jong mans het Swanepoel sr. en sy 80-jarige vrou, Baby, gistermiddag vroeg op hul en hul seun se plaas Sterkfontein, tussen Orkney en Bothaville, aangeval.
Casper sê sy ma is uit die intensiewesorgeenheid na ’n gewone saal oorgeplaas. Sy het ook kopbeserings. Dit gaan redelik goed met haar.
Die Swanepoel-egpaar is met die kolf van ’n gesteelde pistool geslaan.
Plaaswerkers het tot die egpaar se redding gekom en gekeer dat die aanvallers ’n voertuig steel. Boere het daarna een van die jong aanvallers, met ’n gesteelde pistool in sy besit, op ’n buurplaas vasgetrek.
Die polisie-soektog na die tweede aanvaller duur voort.