Agriculture
Schüssler sê landbou is grootste hoop vir werkloses─── 15:00 Wed, 20 Aug 2014
Kimberley - Die ekonoom Mike Schüssler sê landbou is die grootste hoop vir die massas werklose mense op die platteland.
Schüssler het op Agri-Noord-Kaap se kongres in Kimberley gesê Suid-Afrika se werkloosheidsyfers staan op bykans 36% en nie op die amptelike 25% nie. Talle werksoekers wat moed opgegee het, word nie bygereken nie.
Schüssler het gesê openlike en eerlike gesprekke is nodig, om sake te verbeter. Boere moet uit die kassie dink om ’n verskil te maak en gemeenskappe aan hul kant kry.
Die regering moet besef sommige arbeidswette en onbekostigbare minimum lone vererger die werkloosheidsprobleem. Suid-Afrikaners moet eerder werk en waardigheid gegee word.
Talle Noord-Kaapse boere asook landbouleiers en –rolspelers van oor die land heen is in die Diamantstad saamgetrek vir dié kongres wat vanoggend begin het en môre ten einde loop.
Dirk Kok/OFM-nuus
