Hy sê die familie van die drawwer, wat verkies om anoniem te bly, loof die polisie vir hul deeglike werk en goeie diens. Dit kom nadat Charmaine le Roux, haar dogter Charndrei en hul beweerde tuinier, Jerry Brummer, vandag vlugtig in die plaaslike landdroshof verskyn het.

OFM-nuus se Christal-Lize Muller berig dat hulle aangekla word van poging tot moord, sameswering om ‘n moord te pleeg en roof.

Die drie verdagtes is Dinsdag buite die stad in hegtenis geneem.

OFM-nuus verneem vertroulik dat Charndrei bekend is aan die vrou wat aangeval en vir die dood in ysige koue agter gelaat is.

Die aangeklaagdes se advokaat, Willem Edeling, het in die hof aangevoer Charndrei is ‘n kankerlyer en moet behandeling ontvang. Landdros Cornelius Mokgobo het daarna beveel sy kan medies behandel word, terwyl sy en haar ma in aanhouding is by die Parkweg-polisiekantoor tot hul eerskomende Dinsdag aansoek kan doen om borgtog.

Die hof het ook beveel dat Brummer medies ondersoek moet word na hy glo in aanhouding deur die polisie aangerand en met elektrisiteit geskok is. Edeling het gesê Brummer is nog doof in die linkeroor na die beweerde aanranding. Dit is nog onduidelik of ‘n klag van aanranding teen die polisie ingedien gaan word.

Christal-Lize Muller/OFM-nuus