Agriculture
Minder veediefstalklagte ingedien─── 16:19 Thu, 25 Sep 2014
Bloemfontein - Luidens die jongste misdaadstatistieke is 14% minder veediefstalklagte in die laaste boekjaar by die polisie aangemeld. Net meer as 28 000 klagte is by die land se polisiekantore ingedien.
Luidens die statistieke loop KwaZulu-Natal se boere steeds die ergste deur, met 'n kwart van die land se veediefstalklagte wat in dié provinsie ingedien is.
Die Oos-Kaap is daarna die slegste daaraan toe, gevolg deur die Vrystaat.
In Gauteng is 29% meer klagte ingedien en in Limpopo was daar 'n effense toename.
In die res van die provinsies is, luidens die statistieke, minder klagte ingedien.
Die grootste afname in klagte was in die Noord-Kaap.
Die Rooivleisprodusente-organisasie se uitvoerende hoof, Gerhard Schutte, sê daar is boere wat uit frustrasie uit nie meer veediefstalle by die polisie aanmeld nie. Die RPO versoek boere egter om elke veediefstal by die polisie aan te meld, omdat hierdie statistieke die barometer is waarvolgens planne gemaak en stappe gedoen word teen veediewe.
Schutte sê die land se boere verloor minstens R750 miljoen per jaar as gevolg van veediefstal.
Dirk Kok/OFM-nuus