Local News
Potchefstroom: Twee van gesin in botsing uitgewis─── 14:51 Wed, 29 Oct 2014
Potchefstroom - Klein Jan Hendrik van Schalkwyk, ‘n gr.1-leerling aan die Laerskool ML Fick in Potchefstroom was ‘n rustige en dierbare seun.
So beskryf sy skoolhoof, Lourie van der Merwe, die 8-jarige wat kort nadat hy en sy gesin gisteraand in ‘n motorongeluk betrokke was, in die Potchefstroom-hospitaal dood is.
Jan Hendrik se pa, Hendrico, is op die toneel dood nadat die gesin se bakkie teen ‘n vragmotor, wat vermoedelik ‘n u-draai in die pad gemaak het, gebots het.
Hendrico se vrou, Karen, en hul vyf maande oue babadogtertjie is in ‘n stabiele toestand in die Sunshine-hospitaal in Benoni se intensiewesorg-eenheid.
Die egpaar se vyf-jarige seun, Marco is ook in ‘n stabiele toestand in die Potchefstroom-hospitaal.
Karen se stiefouma, Joey Eybers, sê die gesin was op pad na hul kleinhoewe buite die stad toe die ongeluk gebeur het. Eybers sê sy is dankbaar dat die vragmotorbestuurder daarna in hegtenis geneem is. Volgens haar was Hendrico en Jan Hendrik baie geliefd en sy mis hulle alreeds.
Christal-Lize Muller en Sabrina Dean/OFM-nuus