Yellow Door
Teetuintraktaatjies─── ELZETTE BOUCHER 00:00 Tue, 05 Aug 2014
Mens sien dit orals. Klein bordjies met ‘filosofiese’ geskrifte op wat poog om klante by ’n teetuin of koffiewinkel te inspireer. Een van hierdie teetuintraktaatjies laat Elzette Boucher egter met ’n bitter smaak…
“When you eat alone, you choke alone,” lui ’n sêding op die spyskaart van die koffiewinkel. “Regtig?! Dis bietjie ekstreem,” dink ek terwyl my Sondagmiddag lunch date my op die ligging van die betrokke ‘gesegde’ attent maak.
Ek eet darem nie alleen nie. Wel, nie vandag nie. Meeste dae. Dis heel normaal vir my. Ek bly alleen, het nie eens ’n kat nie. En dis my keuse.
Daarom voel ek al meer geaffronteer deur terme soos ‘op die rak’, ‘oujongnooi’ en dalk ’n minder bekende een – ‘vrygesellin’. Ek hou nogal van laasgenoemde, maar dit word as neerhalend beskou. Dalk die gesellin gedeelte…
Ons is van kleins af bang gepraat vir alleen wees. Mens kan ongelukkig wees, maar om hemelsnaam net nie alleen. Daar is nie ’n erger ellende nie. Ons kan in vernietigende verhoudings wees, maar net nie alleen nie.
Ja, ons mag dalk buite by die mans om die braaivleisvuur politics praat, want hulle wil vir ’n oomblik escape van die nappies en die carpool en ons het nog nie nappies en carpools nie.
Vandag is ek diep moedeloos vir ’n samelewing wat ’n mens se waarde ag op hul relationship status. Mens sou hoop ons is al bietjie meer gevorder as dit, maar helaas.
Ná ’n Wikipedia-soektog blyk dit die betekenis van oujongnooi is as volg: ’n vrou wat nog nooit getrou het nie, nie kinders het nie en menopouse bereik. Veertig is ook blykbaar die ouderdom waarop mens dan nou volwaardig op die rak is.
Daar word egter melding gemaak dat die term neerhalend is, so mens moet dit liefs nie gebruik nie. Al work dit dan nou dikwels in ‘beskaafde’ geselskap gebruik.
Een van my kollegas vertel my onlangs dat hy nie dink dis sy doel op aarde om voort te plant nie, en dat hy geskape is vir ’n ander doel.
Ek wil self so ver gaan om te sê dat die Bybel wel sê vermeerder, maar ook dat almal nie kan trou nie. En dis oraait….
Deur die geskiedenis is daar tientalle toonaangewende vroue wat nooit tot trou gekom het nie omdat hulle tot ander dinge verbind was
.
Dink maar aan Koningin Elizabeth die Eerste, skrywer Jane Austin, die moeder van modern verpleegkunde Florence Nightingale, ontwerper Coco Chanel en aktivis Emily Hobhouse.Hierdie vroue het die geskiedenis verander en sou dit waarskynlik nie kon vermag as hulle vir man en kroos moes sorg nie.
In hierdie traktaatjie lê dalk die wortel van die kwaad: “To love is nothing… To be loved is something… To love and be loved in return, is everything…”
So wat ek nou eintlik wil oordra… Leef, moenie bestaan nie. Deel daardie lewe met ’n lewensmaat of met ander in jou lewe. Gee terug aan die samelewing. Beywer jou vir jou cause en moet nooit onvoldoende voel nie.