Hy het egter ontken dat hy betrokke was by hul dood. Tjixa en Jubeba is oorlede nadat hulle glo aangerand is deur ’n groot groep mans, meestal boere, wat hulle verdink het van ’n aanval op Boeta van der Westhuizen se bejaarde pa, Loedie. Die aanval het plaasgevind op Loedie se plaas Biesiesbult naby Parys. Albei mans het later weens hul beserings gesterf. Dit was vandag Muller se eerste verskyning. Die saak is voor landdros Ronnie Mnguni aangehoor nadat die vorige landdros, Leshni Pillay, vroeër aan die saak onttrek het. Van der Westhuizen is borgtog van R10 000 toegestaan.

Die 19-jarige plaasvoorman moet, tesame met sy medebeskuldigdes, Boeta van der Westhuizen, Henk Prinsloo, Anton Loggenberg, Wian van der Westhuizen en Fanie Oosthuizen, weer op 27 Mei in die hof verskyn. Hul bortog is verleng. Die saak is ook uitgestel vir verdere ondersoek en die moontlike arrestasie van nog ’n beskuldigde.

Intussen is aanklagte van moord teen Johan Cilliers sr. en sy seun Johan jr. teruggetrek. Die staatsaanklaer het die hof versoek om die aanklagte teen die twee terug te trek aangesien daar nie genoeg bewyse is dat hulle by die moorde betrokke was nie.

OFM-nuus