Thuli Madonsela het gister aan OFM-nuus gesê die ondersoek sal na verwagting vanjaar nog afgehandel word.

Dit volg nadat sy gister ‘n verslag oor die provinsiale regering se omstrede diensleweringsprojek, Operasie Hlasela, bekend gemaak het, waarin sy bevind het dat die staat en party se belange saamgesmelt is wat tot groot verwarring onder inwoners gelei het.

Sy sê haar verslag oor die regering se omstrede webtuiste vervat bevindings oor die koste daarvan en die tenderprosedure wat gevolg is.

Madonsela sê ‘n tweede verslag oor Operasie Hlasela gaan volg. Intussen gaan 'n verslag oor die Vrystaatse regering se omstrede multi-miljoenrandse Vrede-suiwelprojek na verwagting vandeesmaand bekend gestel word.

Die regering het reeds meer as R500 miljoen aan dié projek bestee ondanks 'n ondersoek deur die nasionale tesourie wat bevind het dat die projek onvolhoubaar is. Die provinsiale regering belê nog steeds miljoene rande in die projek.

OFM-nuus