National
Meer as 40 000 aansoeke vir Lesotho-permitte reeds ontvang─── CATHY DLODLO 15:06 Wed, 29 Jun 2016
Bloemfontein - Die departement van binnelandse sake het teen Maandag reeds 40 000 aansoeke vir die spesiale Lesotho-permitte ontvang.
Dit terwyl die departement gister genoop is om die sluitingsdatum vir aansoeke – wat oorspronklik môre sou wees – uit te stel.
Die minister van binnelandse sake, Malusi Gigaba, sê hy het besluit om aan die versoek vir uitstel van die Lesotho-regering te voldoen nadat sy eweknie oorval is met aansoeke vir identifikasiedokumente. Dié dokumente is nodig as deel van Lesotho-burgers se aansoek, wat voor 30 September verlede jaar onwettig in Suid-Afrika gewerk of gebly het.
Aanvanklik is die verwagte aansoeke op 40 000 tot 50 000 geskat, maar dié skatting blyk nou baie laag te wees.
Intussen het die Lesotho-regering aangekondig dat amptenare ook by grensposte en ander strategiese plekke ontplooi sal word om aansoeke vir ID-boekies op Saterdae en Sondae te ontvang.
OFM-nuus
