So kom ek vertel jou van die OFM middag “drive” program “Mambo Jumbo” : Sommiges hou baie daarvan en ander hou glad nie daarvan nie. Wil jy nog iets weet? OK, OK….sommiges kla daaroor ander kla nie daaroor nie. Nog iets? Ai, ai…jy put my uit.

Maar as jy regtig wil weet: dit word aangebied deur myself, Rian E. van Heerden en dan is daar Margarine (soms besig met die verkeer) en ou Bernie (soms besig met die sport). Ons weet die meeste van die tyd self nie wat gaan gebeur tydens ‘n episode van Mambo Jumbo nie…dit gebeur sommer. Ons het al ou Charlie, die sjimpansee by die Zoo laat ophou rook, ons het al Habanero chilies verober (klink nie indrukwekkend nie totdat jy self een try), Margarine het al die YMCA in die verkeer gaan doen….en paal gedans, ek en ou Bernie het al mekaar met ‘n PVC lat toegetakel, daar was die koeksister kompetisie en Maljan (ons stunt ou) in ‘n taxi/doodskis…en met hand-en voet boeie in die Spur en Casino. Daar was al ‘n reusagtige hond in die studio (wat ons die trappe moes ophelp) en een wat foutiewe kabels uitsnuffel, om nie te praat van die tarantula’s nie….o ja, en die kortste vroutjie in die wêreld. En dan was daar die tokolossie insident..

Dan is daar ook Hennnryyy…wat saam met ons almal wat in die nuus is gereeld met sy produksies help afrip en natuurlik goeie ou Gerald, die kristalballeser, wat elke Woensdagmiddag ons gekwelde luisteraars se toekoms voorspel (dis nou as ‘n luisteraar nie besig is om my fortuin te vertel nie).
En so gaat ons maar aan.

Totdat die vlaggie waai.

Chat met jou vanmiddag.