Polisiewoordvoerder, Amanda Funani sê die aanklagtes van moord en twee  van poging tot moord is Woensdag teen Du Plooy teruggetrek. 

Sy het aan OFM-nuus gesê dat die polisie nou die saak verder gaan ondersoek, wat beteken dat Du Plooy moontlik later weer aangekla kan word indien die opvolgondersoeke resultate oplewer. 

Die 15-jarige Spencer Tshukudu van Blydeville is op 10 Oktober 2017 omstreeks 08:00 naby Sukran, in Lichtenburg tydens ‘n gewelddadige dienslewering betoging doodgeskiet. 

Twee ander jong mans tussen die ouderdom van 17 en 20 jaar, is ook tydens die voorval beseer. 

Du Plooy het in 'n beëdigde verklaring in Oktober verlede jaar verduidelik dat hy en sy werkers tydens die betogings deur ‘n geweldadige groep betogers op Boikhutso-weg aangeval is. 

Hy het geglo hul lewens wa in gevaar. Hy het beweer dat die minderjarige slagoffer deel van die skare was nadat hy sy vuurwapen uitgehaal het en verskeie skote geskiet om homself te verdedig. 

Hy is op dieselfde dag inhegtenis geneem nadat hy omstreeks 22:00 die aand homself aan die polisie oorhandig het. 

OFM-nuus