Annelize Crosby, hoof van grondsake by Agri SA se Sentrum van Uitnemendheid, sê dié grondwetwysiging stuur 'n verkeerde sein uit in Suid-Afrika se ekonomie en veral in die landboubedryf. Volgens haar is vergoeding  nie die rede waarom grondhervorming in Suid-Afrika stadig vorder nie en die wysiging gaan nie ‘n verskil maak aan hoe grondhervorming in die land verloop nie. Haar reaksie kom nadat pres. Cyril Ramaphosa bekendgemaak het die ANC wil hê die uitvoerende gesag en nié die howe nie moet 'n vergoedingsbedrag bepaal, indien grond onteien word. OFM-nuus se Christal-Lize Muller het met Crosby gepraat…

Sien onderstaande PODCAST

In die lig hiervan verwys Crosby na die kategorieë in die bestaande onteieningswetsontwerp, waarvan die kommentaar eerskomende Vrydag by die Parlement ingedien moet word. Hierin word dit gestel dat grond teen ‘n nul-vergoeding onteien kan word en dit sluit onder meer grond in waar daar eise van huurarbeiders is, asook waar die belegging hoër as die markwaarde van die grond is. Sy stel die landbougemeenskap gerus dat hoewel dié proses ver gevorder is, lê daar nog ‘n lang pad voor waarin eers die Parlement en dan die Raad van Provinsies daaroor moet stem. Litigasie om dié proses te stuit is ook ‘n opsie.

OFM-nuus