Hy het o.m. gesê dat die landbousektor in die land 'opvallend goed presteer' ondanks die koronavirus-pandemie. Die president het veral die sitrusbedryf se prestasies uitgelig, aangesien dit die wêreld se tweede grootste uitvoerder van sitrus gedurende 2020 geword het. Ander bedrywe wat erkenning ontvang het was die wyn-, mielie-, neute-, sagtevrugte- en suikerrietbedrywe. Dit het ook sterk uitvoergroei getoon. Ramaphosa het voorts bygevoeg dat die gunstige weersomstandighede van verlede jaar, sowel as aan die begin van 2021, aandui dat landbou waarskynlik op kort termyn sal groei.

EN

Die Landbousakekamer van Suid-Afrika, oftewel Agbiz, waarsku dat die skerp styging in die nasionale minimumloon verskillende arbeidsintensiewe subsektore in die landboubedryf negatief sal beïnvloed. Die Minister van Indiensneming en Arbeid het op 8 Februarie 2021 'n aanpassing van die nasionale minimumloon aangekondig wat vanaf 1 Maart 2021 in werking sal tree. Agbiz se John Purchase sê dat die spesiale bedeling vir plaaswerkers nou uit die weg geruim is, aangesien die minimum loon vir plaaswerkers nou geëwenaar sal word - dit styg van die huidige R18,68 per uur tot R21,69 per uur.

OFM-nuus