Terwyl die twee mans die winkel beroof het, het nog ‘n persoon buite gewag terwyl ‘n ander een buite die winkelsentrum in ‘n silwer Volkswagen Polo vir die rowers gewag het.

Die eienaar van die winkel, Sarel Maree, het bevestig dat 55 selfone ter waarde van sowat R271 793 gesteel is. Een van die selfone het aan ‘n werknemer behoort.

“Gelukkig het niemand seergekry nie, maar die werknemers is baie getraumatiseerd,” het Maree aan Bloemfontein Courant gesê.

Die bestuurder, Johanette Venter, was nie tydens die voorval in die winkel nie, aangesien sy die ander tak in Bloem Plaza besoek het.

“Toe een van die werknemers bel en ek hoor hy huil, het ek dadelik in my kar geklim en Twin City toe gejaag,” sê Venter.

Met Bloemfontein Courant se besoek aan Twin City was die polisie nog op die toneel besig met hul ondersoek, maar hulle kon nog geen kommentaar lewer nie. Die rowers is nog op vrye voet.

Op 'n navraag oor die rooftog aan die winkelsentrum se sekuriteit, het een van die wagte gesê: “Ek het by die deur gestaan, maar omdat hulle wapens gehad het, kon ek niks doen nie.”

Weens die polisieondersoek sal die MTN-tak by Twin City die res van die dag gesluit wees.

Bloemfontein Courant/Jeretha Oosthuizen