Agriculture
'Grondplafonne sal SA seermaak'─── 11:29 Tue, 09 Sep 2014
Bloemfontein - Vrystaat Landbou se president, Dan Kriek, sê grondplafonne of beperkings op die hoeveelheid grond wat boere mag besit, soos wat grondsakeminister Gugile Nkwinti nou weer voorstel, is reeds in die groenskrifproses in diepte bespreek en as ’n onwerkbare plan van die tafel af gevee.
Die landbou-ekonoom Andrew Makanete en die rektor van die Noordwes-Universiteit se Potchefstroom-kampus, Herman van Schalkwyk, het ’n studie gedoen oor grondplafonne in ander lande en bevind dat grondbeperkings Suid-Afrika en sy landbousektor erg sal benadeel.
Vir elke R1 miljoen se afname in produksie kan bykans 30 werksgeleenthede verloor word. ’n Beperking op boerdery-uitbreidings en verdere druk op landbouwinsgewendheid sal tot die bankkrotskap van boere lei. Buitelandse beleggings sal verder afneem en voedselsekerheid sal in die gedrang kom.
Kriek sê ander oplossings vir grondhervorming, wat ekonomies sin maak, moet gesoek word.
AfriSake se uitvoerende hoof, Cornelius Jansen van Rensburg, sê grondbeperkings sal groot landboumaatskappye uit die land uit dryf en produktiewe boere sal minder kos vir die land kan produseer.
Dirk Kok/OFM-nuus