Africa News
Dodetal styg ná oproer by Zim-tronk─── 10:19 Sun, 15 Mar 2015
Harare - Die dodetal na 'n oproer by 'n maksimum-sekuriteitgevangenis in Zimbabwe het intussen tot drie gestyg, het die Zimbabwe-uitsaaikorporasie Saterdag gesê.
Tot 900 gevangenes het Vrydag by die Chikurubi-gevangenis oor swak kos betoog. Soldate, die berede polisie en die brandweer is ontbied.
Daar is bewerings dat die polisie op die betogers geskiet het, maar owerhede het bevestig slegs loskruitpatrone is gebruik.
ZBC het in 'n berig op sy webwerf gesê nog twee gevangenes het intussen beswyk aan beserings wat hulle tydens die oproer opgedoen het. Een gevangene is glo tydens 'n stormloop dood.
Twee bewaarders word steeds by 'n privaat hospitaal in Harare behandel.
'n Groep van vyf gevangenes het glo die oproer begin toe hulle hul komberse aan die brand gesteek het.
Sapa
