Local News
Mangaung hoogverraadverhoor: Slotbetoë begin na verwagting vandag─── CHRISTAL-LIZE MULLER 07:14 Mon, 22 Sep 2014
Bloemfontein - Slotbetoë sal na verwagting vandag begin in die sogenaamde Slag van Mangaung hoogverraadverhoor in die Vrystaatse hooggeregshof.
Johan Prinsloo staan tereg weens 'n beweerde plan om afgevaardigdes by die ANC se 2012 Mangaung-kongres aan te val.
Die verdediging het vroeër sy saak gesluit sonder dat Prinsloo in die getuiebank was. Johann Nel vir die verdediging het aan regter Mojalefa Rampai gesê die besluit is geneem na indiepte-gesprekke en oorwegings.
Prinsloo, Martin Keevy en Mark Trollip is in Desember 2012 in hegtenis geneem.
Trollip het skuldig gepleit op aanklag van sameswering om terreurdade te pleeg en is tot agt jaar tronkstraf gevonnis.
Keevy is onverhoorbaar verklaar.
Christal-Lize Muller/OFM-nuus