National
Ses stropers in Limpopo aangekeer─── 10:48 Tue, 16 Sep 2014
Hoedspruit - Ses vermeende renosterstropers is oor die naweek in twee afsonderlike voorvalle in Limpopo in hegtenis geneem.
Volgens Ronel Otto, 'n polisiewoordvoerder, is drie persone in Hoedspruit aangekeer.
“'n Veiligheidswag het vreemde voetspore by die Klaserie-wildreservaat opgemerk en die polisie ontbied,” het Otto gesê.
“Die wag en die polisie het drie verdagtes opgespoor en hulle in hegtenis geneem. Die verdagtes het 'n hoëkaliberjaggeweer, knaldemper, pistool, ammunisie, byl en vier selfone by hulle gehad.”
Ntiyiso Ngobei (26), Edwards Shai (40) en Lawrence Malatji (42) van Phalaborwa het Maandag in die hof in Hoedspruit verskyn op aanklag van oortreding en die besit van ongelisensieerde vuurwapens en ammunisie. Die saak is tot 18 September uitgestel vir verdere ondersoek.
Nog drie verdagtes is op 'n plaas in die Vaalwater-omgewing in hegtenis geneem.
“Die polisie het op inligting reageer en 'n verdagte voertuig opgespoor wat mense langs die plaas afgelaai het,” het Otto bygevoeg.
“Die voertuig is afgetrek en deursoek. Die polisie het beslag gelê op 'n jaggeweer, ammunisie en ? byl.”
Die drie insittendes is in hegtenis geneem. “Twee mans kon daarin slaag om te ontsnap en die polisie is steeds na hulle op soek.”
Die verdagtes moet Donderdag in die hof verskyn.
Sapa
