National
Leigh Matthews-moordenaar wil nie van tronk verskuif nie─── 08:32 Sun, 29 Mar 2015
Johannesburg - Donovan Moodley, wat skuldig bevind is aan die ontvoering en moord op Leigh Matthews, het 'n aansoek ingedien in 'n poging om die departement van korrektiewe dienste te verhoed om hom uit die Johannesburgse gevangenis te skuif, het die Saturday Star berig.
Volgens die verslag het Moodley Donderdag 'n dringende aansoek by die Johannesburgse hooggeregshof ingedien nadat die departement gepoog het om hom na die Kgosi Mampuru II-tronk in Pretoria te skuif.
Moodley het gesê sy aansoek is 'n poging om seker te maak dat hy steeds sy regstudies deur die Universiteit van Suid-Afrika kan voortsit en sy eksamen in Mei kan aflê.
Die Saturday Star het verder berig Moodley is ook besorg dat hy nie meer sal kan kitaar speel nie, iets wat hom glo “onuitspreeklike vreugde en vertroosting” bring.
Ofentse Morwane, woordvoerder van die departement, het gesê Moodley en ander gevangenes sal bly waar hulle is totdat die departement sy repliek gelewer het.
Moodley is in 2005 skuldig bevind aan die ontvoering en moord op die 21-jarige universiteitstudent en dat hy haar pa afgepers het om geld by hom te kry. Hy is tot lewenslange tronkstraf gevonnis vir haar moord, 15 jaar vir ontvoering en 10 jaar vir die afpersing. Hy is sedertdien in die tronk.
Sapa
