Agriculture
Nerpo-leier vaar uit teen landboubeleid─── 16:44 Wed, 13 Aug 2014
Dirk Kok
Bloemfontein - Die produsente-organisasie vir opkomende rooivleisboere, Nerpo, se besturende direkteur, Agrrey Mahanjana, het vanmiddag op die Rooivleisprodusente-organisasie se nasionale kongres in Bloemfontein uitgevaar teen onstabiele politiek en swak landboubeleid, wat volgens hom die doodsteek van boere en voedselsekuriteit kan wees.
Mahanjana het sterk kapsie gemaak teen onder meer arbeidswetgewing en onbekostigbare minimumlone, voorgestelde grondplafonne om grondbesit te beperk en teen minister Gugile Nkwinti se plan dat tot 50% van plase onder werkers verdeel moet word.
Hy het gesê die regering struktureer sy beleid en wetgewing rondom 2,8 miljoen bestaansboere, terwyl daar nie na kommersiële en opkomende boere geluister word nie.
Mahanjana het gepleit dat kommersiële boere en opkomende boere met mening hande moet vat om beleid te beïnvloed.