Central SA
Polisiebeamptes kry borgtog vir ontvoering, dwarsboming van gereg─── CHARNÉ VAN DER MERWE 10:36 Fri, 12 Apr 2024
“Ten spyte daarvan dat die klaer vir hulle gesê het dat hy nie ’n saak by die polisiekantoor aangemeld het nie en sy onwilligheid om saam met hulle te gaan, het hy wel ingestem nadat hulle hul dienskaarte aan hom gewys het.”
Twee polisiebeamptes wat van ontvoering en dwarsboming van die gereg aangekla word, moet op 26 April in die Khutsong-landdroshof in die Wes-Rand, Gauteng, verskyn. Hulle is R5 000 borgtog elk toegestaan.
Sers. Isaac Mathe Mokalolise en konst. Phumlani Dlamini, asook twee medepligtiges, het na bewering die klaer se woning in ’n staatsvoertuig besoek en valslik beweer daar is bewyse by die polisiekantoor teen hom, sê Lumka Mahanjana, Gautengse NVG-woordvoerder.
Ten spyte daarvan dat die klaer vir hulle gesê het dat hy nié ’n saak by die polisiekantoor aangemeld het nie en onwillig was om saam met hulle te gaan, het hy wel ingestem nadat hulle hul dienskaarte aan hom gewys het.
Die polisiebeamptes het egter ’n ander pad gery, waarna die klaer dit bevraagteken het. Hy is toe deur die twee medepligtiges, wat steeds op vrye voet is, met ’n vuurwapen gedreig.
Two police officers have been arrested in Khutsong following a 2nd kidnapping case in 2 weeks.
— 919News (@919News_) April 8, 2024
A resident was robbed & taken on Saturday after he was approached by 3 men who said they were officers.
SAPU says they strongly condemn the accusations against their members.#919News pic.twitter.com/Z9GLzw1VNH
Toe die klaer sien sy broer ry verby, het hy om hulp geskree. Die broer het die voertuig agtervolg en tot stilstand gebring. Die polisiebeamptes is toe in hegtenis geneem deur ’n kollega, ook ’n polisiebeampte, wat van diens af was en die voorval gesien gebeur het.
Die beskuldigdes het tydens hul eerste hofverskyning onskuldig gepleit, sê Mahanjana. Voorwaardes vir hul vrylating sluit in dat hulle nie die Merafong-distrik mag binnegaan nie, of hul jurisdiksiegebied mag verlaat sonder om die ondersoekbeampte in kennis te stel nie.
Hulle mag ook nie met staatsgetuies inmeng nie, en enige vuurwapens moes oorhandig word.