Respiratoriese sinsitiale virus (RSV) en brongiolitis is algemene bekommernisse in pediatriese sale landswyd, veral gedurende koeler maande. RSV, asook ander respiratoriese virusse soos die rhinovirus en para-influensa-virus, kan lei tot brongiolitis, ’n lugweginfeksie wat hoofsaaklik kinders onder twee jaar oud affekteer.

Baie virusse kan brongiolitis veroorsaak, maar RSV is die bekendste een. Dit kom hoofsaaklik voor by kinders jonger as twee jaar, veral by babas, vertel dr. Chantelle van der Bijl, ook bekend as Bloem MomDoc op sosiale media.

RSV manifesteer as verkoueagtige simptome, maar kan vererger tot asemhalingsprobleme, wat hospitalisasie noodsaak. Dit oorheers ook brongiolitisgevalle, wat lei tot 90% van hospitalisasies tydens spitsseisoene.

‘Simptome is baie dieselfde as dié van ’n gewone verkoue’

Volgens Van der Bijl is die uitbreking hiervan seisoenaal en bereik dit ’n hoogtepunt in Suid-Afrika vanaf Februarie tot Junie. “Die oordrag vind plaas deur fisieke kontak, hoes en nies, wat die belangrikheid beklemtoon om noue kontak te vermy, veral met babas.”

Premature babas en dié met onderliggende gesondheidstoestande loop die grootste gevaar van ernstige RSV-siekte, wat dikwels intensiewe sorg verg. Simptome is baie dieselfde as dié van ’n gewone verkoue, maar kan vorder tot hyg, asemhalingsprobleme en ander kommerwekkende tekens wat mediese aandag noodsaak.

Hoewel geen entstof vir RSV bestaan nie, kan Palivizumab-inspuitings ernstige laerlugweginfeksies by hoërisikokinders, soos premature babas en diegene met hart- of longtoestande, voorkom. Hierdie medikasie is egter duur en moet maandeliks gedurende RSV-seisoen toegedien word.

Ander behandeling is toegespits op ondersteunende sorg, insluitend die handhawing van hidrasie, die gebruik van nasale soutdruppels en die noukeurige monitering van simptome. Van der Bijl verduidelik dat antibiotika nie effektief teen RSV is nie. Hospitalisasie, waar binneaarse vloeistowwe en suurstofondersteuning verskaf word, kan nodig wees vir ernstige gevalle.

‘Maak seker dat jy jou kind weghou van mense met verkouesimptome’

Om RSV te voorkom, is dit belangrik om gereeld hande te was. Was ook enige speelgoed en gebiede waar kinders speel, veral as hulle siek is.

“Maak seker dat jy jou kind weghou van mense met verkouesimptome, veral gedurende die RSV-seisoen. Ontmoedig ander om jou baba te soen en moenie jou baba aan tweedehandse of derdehandse rook blootstel nie. Indien jy kan, probeer so lank moontlik borsvoed,” sê Van der Bijl.

Langtermyneffekte van RSV is herhalende respiratoriese simptome wat later in hul lewe na asma kan lei.

OFM Nuus/Charne van der Merwe mvh