Die Nasionale Saalperdkampioenskappe begin Maandag 22 April 2024 by die Bloemfontein-skougronde en is een van vele byeenkomste wat deel vorm van Bloemskou se landbouprogram.

Die kampioenskap is nie net ’n geleentheid vir perdeliefhebbers om die pragtige ras te bewonder nie, maar dien ook as ‘n viering van familie en prestasie. Met bykans 900 perde wat vanjaar ingeskryf is, beloof hierdie skou ‘n grootse vertoning te wees.

Die saalperde, ’n ras bekend vir hul skoonheid en liefde vir aandag, floreer in die skou-omgewing. Dit is ‘n tyd waarin families saamkom om deel te neem en aan te moedig.

“Hierdie is regtig ‘n familiesport wat almal aan kan deelneem,” vertel vise-president en hoof van bemarking vir die Suid-Afrikaanse Saalperdgenootskap, Koekie de Villiers. “Ma, pa, kinders, oupa, ouma – almal is hier. Almal neem deel.”

Die Saalperdskou spog ook met ‘n internasionale element, met beoordelaars van hoogstaande kwaliteit wat van regoor die wêreld afkomstig is. Hierdie beoordelaars bring ‘n breë kennis van perde en ‘n vars perspektief na die skou.

“Die Amerikaanse beoordelaars wat ons vanjaar gebruik, is regtig hoog gekwalifiseerd,” verduidelik ’n organiseerder. “Hulle het al die wêreldkampioenskappe in Louisville beoordeel. Dit verseker ’n objektiewe en professionele beoordeling van die perde.”

Die hoogtepunt van die skou is die groot kampioenskappe Saterdagaand, waar die paviljoen volgepak is met entoesiastiese toeskouers. “Dit is die toppunt van alles,” vertel De Villiers. “Die mense hier is fantasties en hulle ondersteun ons perde met groot entoesiasme.”

OFM/Agriculture cg