Upington se munisipale woordvoerder, Patrick Williams, vertel aan OFM-nuus dat een van die dorp se grootste uitdagings vullisstorting is, want mense strooi op 'n gereelde basis vullis op enige plek in dorp. Williams sê hulle het 'n maandelikse program as die munisipaliteit, waar hulle toesien dat alle vullis in alle gebiede verwyder word. Hy sê die munisipaliteit bestee ‘n week in een wyk waar hulle ook ‘n bewusmakingsveldtog het om mense in te lig oor die gevare van vullisstorting.

Williams sê nog 'n groot uitdaging wat die dorp in die gesig staar, is vandalisme. Hy sê sodra 'n munisipale gebied gevandaliseer is, moet geld belê word om die geriewe te herbou of skoon te maak. Munisipale sale en begraafplase is van die geriewe wat op 'n gereelde basis gevandaliseer word. Hy sê die munisipaliteit is in die proses om die geriewe te herstel en versoek die gemeenskap om verantwoordelikheid vir eiendomme te neem.  

OFM-nuus/Blaine Jones