Die party sê in ‘n persverklaring dat die opsystaan-beleid gemik is op lede wat ernstige klagte - soos korrupsie, verkragting, en moord - in die gesig staar en dat dit nie van betrekking op Lekwene is nie.

Die party se sekretaris, Deshi Ngxanga, sê omdat Lekwene nie voor 'n hof gedaag is nie, gaan die party hom nie vra om opsy te staan nie.

Dit, nadat 'n verslag van die Openbare Beskermer in Junie vanjaar vrygestel is ná 'n ondersoek na onbehoorlike optrede en wanadministrasie met betrekking tot die beweerde fooi wat Lekwene sou ontvang ná die aanstelling van die uitvoerende hoof van die Noord-Kaapse Dobbelraad.

Lekwene was suksesvol in sy dringende interdik in die Noord-Kaapse Hooggeregshof om tugstappe teen hom te staak.

OFM-nuus/Roderick Titus