Volgens mediaberigte gaan ‘n lid van ANC die party hof toe sleep oor Mxolisi Dukwana se aanstelling. Die lid – wie se naam aan OFM-nuus bekend is – gaan glo aanvoer dat sy, en nie Dukwana nie, volgende op die lys vir 'n aanstelling in die Wetgewer was. 

Woordvoerder van die ANC se interim provinsiale komitee, Oupa Khoabane, sê die party het deur die media van die hofaksie verneem. Hy sê hulle gaan met hulle regsverteenwoordiger vergader oor die pad vorentoe.

LUR Dukwana moes ingryp in die Mangaung Metro se metropolisie-sage en het ‘n ooreenkoms met gemeenskapsdrukgroepe gesluit dat die eenheid ondersoek sal word, asook die aanstellingsproses vir sy lede. 

Intussen het hy ook die Water en Sanitasie Minister, Senzo Mchunu, na Maluti-a-Phofung munisipaliteit vergesel om die voortslepende watertekort aan te spreek. Hy het die munisipaliteit gevra om ‘n vergadering met die Departement van Water en Sanitasie te belê om dringend aan die kwessie aandag te gee.

OFM-nuus