Makgoe het Dinsdagoggend vroeg leerlinge by die Laerskool Credence in Bloemfontein verwelkom. Makgoe het nie net die skoolperseel en personeel gemonitor nie, maar het ook direk met die leerders interaksie gehad. Hy beplan om later vanoggend die Lereko Sekondêre Skool te besoek, asook die Albert Moroka Sekondêre Skool in Thaba Nchu. 

Makgoe sal die jaar se beplanning vir die Albert Moroka Sekondêre Skool aanspreek nadat dit verlede jaar deur 'n storm geraak is.

Matriekvraestelle is by dié skool, wat ook 'n nasiensentrum was, beskadig en 'n nasiener is lig beseer tydens 'n swaar haelstorm wat die skool in Thaba Nchu beskadig het. Die departement het gesê die dak by die skool het afgewaai terwyl nasienwerk gedoen is. 

Intussen het Makgoe tydens sy besoek aan die Laerskool Credence opvoeders aangemoedig om vanjaar op 'n persoonlike en akademiese grondslag 'n impak in elke kind se lewe te hê.

OFM-nuus