OFM-nuus het vroeër berig dat LUR William Bulwane aangedui het dat hy nie veel inligting hieroor kan bekend maak nie, want sommige inligting is sub judice. Sy kantoor het egter aangedui dat ‘n nuuskonferensie – om die bewerings te bespreek – vandag gehou gaan word.

Die Provinsiale Sekretaris van die EFF in die Vrystaat, Malefane Msimanga, het beweer dat dié departement, alvorens enige werk verrig is, altesaam R180 miljoen aan kontrakteurs betaal het. 

Bulwane gaan ook na verwagting aandui hoe ver sy kantoor is met die ondersoek na amptenare in sy department wat betrokke was by wanadministrasie en onbehoorlike gedrag. 

Dit kom nadat die Openbare Beskermer, Busisiwe Mkhwebane, gevind het dat die departement skuldig is aan onnodige vertraging toe dit versuim het om ‘n aansoek vir ‘n private voertuigtoetsstasie te oorweeg. 

Dié aansoek is reeds in 2015 gedoen. Ingevolge Mkhwebane se verslag moet die Hoofdirekteur: Korporatiewe Dienste, amptenare wat vir die vertraging verantwoordelik is, ondersoek en teen die skuldiges optree.

OFM-nuus