Central SA
Welstand van Noord-Kaapse kunstenaars, atlete aangespreek─── HEIDRÈ MALGAS 10:46 Tue, 01 Nov 2022
Kunstenaars en atlete gebaseer in die Noord-Kaap sal die geleentheid kry om professionele mense en sterre in die bedryf te ontmoet en meer oor dié mense se reis as opkomende sterre te leer.
Hierdie geleentheid se kerndoel is om bewustheid van die SILAPHA-welstandsprogram te skep en om kunstenaars en atlete in die Noord-Kaap aan te moedig om van beskikbare hulpbronne gebruik te maak.
Met die tema, "Besit jou talent deur en deur/Own your talent through and through", het hierdie program ten doel om kwessies aan te spreek wat Suid-Afrikaanse sportatlete en kunstenaars raak, met die primêre fokus op kwessies wat verband hou met geestesgesondheid, dwelmmisbruik, finansiële bestuur en regsaangeleenthede.
Die Minister van Sport en Kultuur, Nathi Mthethwa, sal die program amptelik in die Noord-Kaap bekendstel. Genooide opkomende en gevestigde kunstenaars en atlete van die provinsie sal dit bywoon.
Northern Cape it's Your Turn!
— Department of Sport, Arts and Culture (@SportArtsCultur) October 26, 2022
Minister @NathiMthethwaSA brings Wellness Intervention to Artists and Athletes in the Northern Cape
Theme: Own your talent through and through
Date: 1 Nov 2022
Time: 8h00
Venue: Northern Cape Theatre#Silapha
More info: https://t.co/4DxJzKPD6T pic.twitter.com/jA8tGgelIm
(Die datum is intussen verander na Donderdag 3 November 2022.)
Die Paralimpiese atleet in kragoptel, Ricardo Fitzpatrick, wat een van die sprekers sal wees, sê die welstandsprogram spruit uit kunstenaars of atlete wat finansiële druk ervaar, of met geestelike of fisiese probleme worstel.
“Baie mense, veral kunstenaars, het selfmoord gepleeg as gevolg van die Covid-19 pandemie en ander druk. Daar is groot kunstenaars, soos onder andere Riky Rick, wat ook geestelike probleme ervaar het. So hierdie dag gaan daaroor om sportsterre en kunstenaars daarvan bewus te maak dat daar mense is met wie hulle kan praat,” sê Fitzpatrick.
Hy sê dat hy oorspronklik liggaamsbou wou doen, maar aangeraai is om eerder kragoptel te doen. Hy het 'n aantal titels, nasionaal en internasionaal, ingepalm.
Gebore en getoë in die Noord-Kaap, sê hy dat die provinsie 'n diep geskiedenis van sport en kuns het en hy glo sport vorm kinders wat op skool met leergestremdheid sukkel en dat sport jou nie net fisies stimuleer nie, maar ook geestelik.
Ricardo, saam met mede-sportman, Doktor Khumalo, en akteurs Dawn Thandeka King en Thato Molamu, sal by die minister aansluit in 'n paneelbespreking waar hulle hul persoonlike reise sal deel, asook van die uitdagings wat hulle in hul onderskeie loopbane in die gesig gestaar het.
Die geleentheid vind Donderdag 3 November 2022 om 08:00-17:00 by die Noord-Kaapse Teater in Kimberley plaas.
