’n Agtjarige meisie was lewend in Khayelitsha, Kaapstad, gevind nadat sy meer as ’n week tevore op pad skool toe ontvoer is. Maar 23% van vermiste kinders is minder bevoorreg, van wie sommige nooit lewend gevind word nie, volgens Missing children South Africa.

Kriminoloog en Nasionale Koördineerder vir Vermiste Kinders Suid-Afrika, Bianca van Aswegen, sê kinders en volwassenes word slagoffers van verskeie soorte ontvoerings. Die risiko van ontvoering hang af van wie die slagoffer is en wat die oortreders se motief is.

Sy sê, afhangende van die saak waarmee daar gehandel word, is dit meestal mensehandel. Die kinders sal byvoorbeeld verkoop word vir seksuele uitbuiting, arbeid, onwettige aanneming en orgaanhandel. In sommige gevalle word kinders deur 'n familielid ontvoer. Hierdie tipe gevalle gebeur gewoonlik tydens egskeidingskikking of iets wat binne die huwelik gebeur.

Van Aswegen sê daar was 'n toename in ontvoerings waar kinders vir opportunistiese doeleindes geneem word, tradisionele medisyne-doeleindes en losprys-eis-ontvoerings. Die uitwerking van Covid-19 op die ekonomie het ook 'n rol gespeel in die toename in ontvoerings, aangesien baie mense desperaat is vir geld.

Mense word aangemoedig om enige geval van vermiste persone by hul naaste polisiestasie aan te meld en kontak te maak met Missing Children South Africa. Van Aswegen voeg by dat mense nie moet wag om 'n persoon of 'n kind as vermis aan te meld nie. Mense is onder die indruk dat hulle 24 uur moet wag en dit bestaan nie. Hulle moet dit onmiddellik by hul naaste polisiestasie aanmeld sodat daar onmiddellik opgetree kan word.

OFM-nuus/Bambatha Giko