Talle laagwaterbrûe is reeds oorstroom en het Keimoes van omliggende gebiede afgesny.

Die munisipaliteit sê hulle is bewus van mense wat deur die water na Keimoes swem vir noodsaaklikhede soos kos en vars water.

Die span werk sedert Maandag daaraan om vars drinkwater vir inwoners te verseker, en versoek dat inwoners ondanks die huidige omstandighede liefs nie die rivier moet trotseer nie.

Burgemeester Marshall Matthys het 'n beroep op inwoners gedoen om die beginsel van Ubuntu toe te pas en mekaar in hierdie moeilike tyd te help.

Intussen het SANparke dele van die voetpaadjies by die Augrabiese watervalle gesluit as 'n voorsorgmaatreël om besoekers se veiligheid te verseker.

SANparke se Genevieve Maasdorp sê die besluit is geneem weens die hoë volumes water wat tans oorstromings veroorsaak.

Maasdorp sê besoekers kan steeds die waterskouspel vanuit sekere areas binne die park besigtig.

OFM-nuus/Roderick Titus