Dié gelukkige man, wat in sy 30's is en al 15 jaar as administrateur werk, het vroeër vanjaar die kaartjie in Checkers, Randburg, gekoop.

Gewoonlik, het hy volgens The South African gesê, kontroleer hy nie sy kaartjies nie. Trouens, hy het nog ongemerkte kaartjies in sy besit.

"Daar was al gevalle waar van my kaartjies uiteindelik ná 'n jaar verval het. Met hierdie spesifieke wenkaartjie was dit egter deel van 'n bondel wat ek besluit het om die afgelope Sondag by 'n Sasol-garage te gaan verifieer," het hy gesê.

Ten spyte daarvan dat hy oornag 'n multimiljoenêr geword het, beoog die man om aan te hou werk, aldus News24.

Hy het geen planne om oordadig geld te begin uitgee nie en het daarvan opsygesit om sy huislening te vereffen. "Ek is gewoond daaraan om geld te hê en dit te bestuur, daarom sal my leefstyl nie regtig verander nie, alhoewel ek dalk iets spesiaals vir my gesin sal doen. Ek is nie haastig om geld te begin uitgee nie, want ek is reeds baie gemaklik.

Sedert Januarie was daar agt lotery-miljoenêrs.

In Januarie het 'n man van Roodepoort, wat 'n nederige bestaan gevoer het, die boerpot van R32 miljoen in die lotto-trekking op Oujaarsaand gewen.

’n FNB-speler het ook op 7 Februarie die hoogste boerpot van die jaar gewen – R60 miljoen. Die lotery-operateur, Ithuba, het in 'n verklaring gesê FNB sal die wenner kontak.

OFM-nuus