Die beskuldigde het verlede Donderdag sy eerste verskyning in die Boksburg-landdroshof gemaak. Hy word van die moord op Izak van Zweel aangekla.

Op 29 September 2016 is Van Wyk skuldig bevind aan die moord op Van Zweel, met voorbedagte rade, en tot lewenslange tronkstraf gevonnis. Van Wyk het egter suksesvol geappelleer weens ’n tegniese punt dat die landdros versuim het om hom in te lig van sy reg om te versoek dat assessore tydens die verhoor aangestel word. 

Sy skuldigbevinding en vonnis is tersyde gestel, en die hof het beveel dat die saak van voor af aangehoor word – dít het nooit gebeur nie.

AfriForum se privaatvervolgingseenheid het verlede Dinsdag ’n brief aan die Nasionale Vervolgingsgesag (NVG) gestuur waarin hulle gevra het hoekom die saak nie weer ingeskryf is nie. 

Binne drie dae is dit bevestig dat die getuies steeds beskikbaar is, ’n nuwe lasbrief vir sy inhegtenisname is uitgereik, en Van Wyk is voor die hof gebring.

Die eenheid verteenwoordig Van Zweel se suster, Lizette Brooks.