Ramaphosa het volgens die SAUK Donderdag die Nasionale Huis van Tradisionele en Khoisan-leiers in die Nasionale Raad van Provinsies (NROP) geopen.

Tradisionele en Khoisan-leiers sê hulle het Woensdag, 'n dag voor die president se toespraak, met Aaron Motsoaledi, minister van binnelandse sake, vergader. Hy het hulle ingelig oor kwessies rondom onwettige immigrasie en vlugtelinge.

Ramaphosa sê Tradisionele en Khoisan-leiers moet met die regering saamwerk om 'n magdom uitdagings aan te spreek wat hul gemeenskappe in die gesig staar, insluitend migrasie.

Die Voorsitter van dié Huis, Kgosi Thabo Seatlholo, sê hulle is bly dat Motsoaledi 'n bereidwilligheid toon om die kwessie van migrasie te hanteer.

“As plattelandse mense ervaar ons baie mense wat in ons gemeenskappe inkom en die meeste van die tyd vind jy dat sommige van hulle betrokke is by kriminele aktiwiteite, veral veediefstal. Jy vind dikwels dat wanneer daar polisie-ondersoeke is, mense wat ons land en ons dorpe onwettig inkom, baie betrokke is by die steel van ons beeste, ons bokke en skape. En soms het hulle dit selfs na ons buurlande en dorpe geneem. Dit is regtig 'n groot kwessie. Ons voel dat daar geen behoorlike fokus of beheer daaroor is nie. Maar gelukkig het die minister gister werklik die voorneme getoon om werk daarvan te maak,” sê Seatlholo.

Die Voorsitter van die Nasionale Khoi en San Raad, Cecil le Fleur, het gesê Tradisionele en Khoisan-leiers was verenig in 'n beroep op Motsoaledi om die uitdaging van immigrasie te hanteer. Hy het Motsoaledi gevra om 'n robuuste aksieplan te begin deur die immigrasiewette in werking te stel.

“So, ons ervarings met betrekking tot hierdie kwessies is redelik soortgelyk in die verskillende gebiede van die land. En ons beskou dit as 'n baie, baie belangrike saak. En in my bydrae het ek die minister gevra om 'n robuuste aksieplan te begin, die grondoorsake te begin aanspreek, en hoe ons die verskillende wette wat reeds daar is, kan implementeer. So, ons weet die wette is daar, maar dit gaan alles oor die implementering van daardie wette wat ons in hierdie posisie hou dat ons [gyselaar] gehou word deur hierdie vlugtelinge en onwettige immigrante,” het Le Fleur gesê.

OFM-nuus