Die regters van die Mahikeng Hooggeregshof in Noordwes het vroeër bevind dat Goane Jack Siamisang Montshiwa, wat sy LLB-graad deur Unisa behaal het, ook nie die nodige praktiese beroepsopleiding voltooi het nie. Hulle het sy aansoek afgekeur om as ’n prokureur toegelaat te word. Montshiwa se aansoek om verlof tot appèl teen dié beslissing was onsuksesvol, waarna hy hom tot die Appèlhof gewend het.

Die Appèlhof se waarnemende adjunkpresident, Nambitha Dambuza (met regters Caroline Nicholls en Mahendra Chetty wat saamgestem het), het gesê sy glo nie dat Montshiwa na die Hooggeregshof teruggestuur moet word om ’n nuwe aansoek om verlof tot appèl te doen nie. In plaas daarvan moet die hof sy inherente bevoegdhede kragtens die Grondwet uitoefen om die meriete van die aansoek te oorweeg om “veelvuldige, vrugtelose hofverrigtinge tussen dieselfde partye te vermy”.

Tania Broughton van GroundUp berig Regter Dumbuza het gesê sy is nie oortuig dat ’n ander hof tot 'n ander gevolgtrekking sou kom oor Motshiwa se geskiktheid om 'n regspraktisyn te word nie.

“Die howe in hierdie land en elders het sekere eienskappe vir ’n geskikte en gepaste persoon geïdentifiseer, soos wat in die Regspraktykwet vervat is. Dit sluit integriteit, harde werk, waardigheid, eerlikheid, regverdigheid en respek vir regsorde in,” het sy gesê.

Hoewel die uitdrukking "gepas en behoorlik" nie in die wet omskryf is nie, was een van die doelwitte daarvan om toepaslike standaarde van die professionele praktyk te verbeter en te handhaaf, het sy gesê.

“As ’n regspraktisyn sal daar van mnr. Montshiwa verwag word om homself met die hoogste graad van integriteit te gedra … beledigende, vulgêre en afbrekende taal deur ’n regspraktisyn kan nie geduld word nie.”

Lees die volledige beslissing hier.

Regter Dambuza het gesê dit blyk uit die rekord dat Montshiwa se optrede ver tekortskiet.

“Dit is duidelik dat sy waardering vir die prosesse, prosedures en dekorum van ons howe gebrekkig is,” het sy gesê.

In reaksie op teenkanting teen sy toelating deur prokureur Jerry Sithole, het Montshiwa beweer dit was die gevolg van “bitterheid en onnoselheid” en was ’n “idiotiese stap … gemotiveer deur onnoselheid”.

Toe 'n ander prokureur, J Nkomo, 'n aansoek ingedien het om in die toelatingsverrigtinge in te gryp ten einde sekere gedrag deur Montshiwa in die hof op rekord te plaas, het Montshiwa na die aansoek verwys as "idioties", "barbaars" en wat verwag kan word van 'n "passievolle eerstejaar regstudent".

Regter Dambuza het gesê Montshiwa het aan die Minister van Justisie en Korrektiewe Dienste geskryf en versoek dat hy ’n kommissie van ondersoek instel om "die verhouding tussen mnr. Nkomo en die Noordwes Hooggeregshofbank" te ondersoek.

Die destydse regterpresident van die Noordwes-afdeling is ook nie gespaar in Montshiwa se tirade nie, wat haar leierskap as "'n bespotting" beskryf het. Hy het ook ’n strafregtelike klag teen haar gelê.

Hy het verder beledigings gerig teen regters wat sy aansoek om toelating aangehoor het en hulle van vooroordeel en samespanning met die regterpresident beskuldig.

In die Appèlhof het hy voortgegaan met sy gewelddadige haat- en woede-aanvalle “wat sy gebrek aan waardering bewys vir die etos en beginsels wat die regsberoep en die howe van hierdie land beheer”, het regter Dambuza gesê.

Regter Dambuza het gesê Montshiwa het nie die gedrag en uitlatings wat aan hom toegeskryf is, betwis nie, maar net volgehou dat sy optrede nie onvanpas was nie.

“Dit kan nie so wees nie … teen hierdie agtergrond sal geen ander hof anders bevind as die beslissing van die Hooggeregshof nie,” het sy gesê en die aansoek om verlof tot appèl met koste van die hand gewys.

OFM-nuus