Central SA
Vier mans en vrou vas oor skape in gesteelde motor─── 16:43 Wed, 22 Mar 2023
Vyf mense is in die Noord-Kaap in hegtenis geneem nadat hulle met vier vermoedelik gesteelde skape in die bagasieruim van hul motor betrap is.
Die voorval het Maandag, 20 Maart 2023 op die pad na Askham, sowat 10 km buite Upington gebeur.
Vier mans en ‘n vrou, tussen 29 en 36 jaar oud, is in hegtenis geneem.
Die provinsiale woordvoerder van die polisie in die Noord-Kaap, sers. Omphile Masegela, sê die polisie het Maandag operasionele pligte uitgevoer toe hulle ingelig is oor ’n wit Renault Clio wat skape vervoer.
“Die voertuig is sowat 10 km buite Upington opgemerk en ’n hoëspoed-jaagtog het gevolg. Die voertuig is later voorgekeer en vier skape is in die bagasieruim gevind,” sê Masegela.
Nie een van die insittendes kon ‘n bewys van eienaarskap van die skape verskaf nie. Die polisie het ook vasgestel dat die Renault Clio as gesteel in Kaapstad aangemeld is.
“Die verdagtes staan tereg op aanklagte van veediefstal en die besit van gesteelde eiendom. Hulle sal na verwagting almal binnekort in die landdroshof in Upington verskyn,” sê Masegela.
