Inwoners sonder watertenks by hul huise moet water by waterpunte gaan haal.

Die probleem met watertekorte duur reeds jare, sê Reona Hollenbach, ’n inwoner. “Ons het water in opgaartenks by ons huis, maar dit is byna klaar. My probleem is arm inwoners wat water met kruiwaens moet aanry huis toe. Baie van hulle is ou mense wat hul laaste pensioengeld uithaal om mense te betaal om water te gaan haal. Dit breek ’n mens se hart om mense so te sien sukkel.

“Dit is skreiend dat die munisipaliteit nie heeltyd hul hand op die watertoevoer hou om te verseker daar is konstante watertoevoer nie. Baiekeer word die opgaardam net 40% of tot 60% gevul voordat dit oopgemaak word. Die watertoevoer hou nie lank nie. Dit moet heeltemal volgemaak word voordat dit oopgedraai en daagliks gemonitor word.

“Wanneer daar water is, word die toevoer na sekere gedeeltes in die dorp sonder rede toegedraai. Dit kom voor asof iemand besluit wie water mag kry, en wie nie, wat onregverdig is.”

Gamagara Community Forum proporsionele raadslid, Shephard Mines, sê hy het ingevolge ’n raadsbesluit gehelp dat benewens die waterpunte, ’n vragmotor tussen strate in verafgeleë woonbuurte ry om water te versprei, veral na bejaarde mense.

Die munisipale woordvoerder, Kamogelo Semamai, sê hul tegnici werk hard om die probleem spoedig op te los. Intussen is watertenks beskikbaar gemaak.

Olifantshoek se watertoevoer is meesal afhanklik van Bloemwater.

“Bloemwater ervaar tegniese probleme, wat die konstante toevoer belemmer. Ons het jare gelede ook boorgate gesink om die watertoevoer aan te vul. Die water uit die boorgate is egter nie genoeg nie weens die onvoldoende watertafel. Ons het reeds ’n tenderadvertensie uitgesit om meer boorgate te sink.”

OFM Nuus