Vaughn was van die O.R. Tambo-lughawe in Kempton Park onderweg na Pretoria. Op die R25 tussen Bapsfontein en Bronkhorstspruit het twee mans uit ’n dubbelkajuitbakkie gespring en op sy Toyota Land Cruiser losgebrand.

"Ek het teruggeskiet en die aanvallers het gevlug," sê Vaughn.

Die motief vir die aanval is nog onbekend. Van die mense wat in Liebenberg se diamantpakkies belê het, bespiegel dat Liebenberg iets daarmee te doen het. Hulle glo dat hy Vaughn wou skrik maak.

Vaughn het verlede week ’n tussentydse interdik teen hom verkry vir intimidasie, teistering, dreigemente en laster. Dit volg nadat Liebenberg hom van verskeie misdade beskuldig het.

Liebenberg wou of kon nie met OFM Nuus praat nie. Sy prokureur, Walter Niedinger, wou ook nie kommentaar oor die skietery lewer nie.

Liebenberg se woordvoerder, Sean Newman, sê hulle was nie bewus van die sluipmoordaanval op Vaughn nie. Hulle betreur die voorval en het hom sterkte toegewens.

Newman sê Liebenberg het ’n beloning van R100 000 uitgeloof vir enigeen wat kan help om die skuldiges aan te keer.

Die redakteur van Die Waarheid, Dirk Lotriet, (Liebenberg se koerant) sê die aanval is glo die waarheid.

"Dit het glo gebeur, maar geen sterftes nie. Dis al wat ek weet. Baie mense dink dis gedoen om Louis te benadeel, maar ek het geen inligting nie."

OFM Nuus