Volgens die polisiewoordvoerder Lorraine Earle het die plaaslike polisie en spesialis-eenhede deur die dag voortgegaan om ná die rooftog rondom die toneel van die misdaad te soek.

Die polisie het by verdere ondersoek 'n paar van die gesteelde items herwin. Hulle het ook twee 9mm-pistole, twee gewere, 'n gaspistool, kos, klere, 'n selfoon en juweliersware herwin.

OFM Nuus het voorheen berig dat Adamus (Dami) Stemmett (53) en sy vrou, Zelda (42), asook 'n vriendin van haar, Woensdagaand (17/5) omstreeks 20:30 deur ses gewapende mans oorval is terwyl hulle inkopies afgelaai het. Hulle het Stemmett na binne gedwing.

Die verdagtes het sy vrou en haar vriendin vasgebind en drie vuurwapens, juweliersware, selfone en kontant geroof. Die boervrou se vriendin was besig op haar foon toe die rowers toeslaan en kon hulp ontbied. Heelparty boere van omliggende plase het flink gereageer en twee verdagtes aangekeer.

LEES OOK: Twee vas ná Senekal-plaasaanval

“Ná die voorval is ’n 37-jarige verdagte in hegtenis geneem en 'n groot hoeveelheid kontant is in sy besit gevind. Die bestuurder van die motor waarmee die verdagtes wou vlug, 'n 33-jarige vrou, is ook aangekeer.

“ 'n Uzzi-vuurwapen en voertuigsleutels wat aan Stemmett behoort, is buite die erf van die plaas gevind. Vyf verdagtes is egter steeds op vrye voet,” het Earle gesê.

OFM Nuus