Die Noord-Kaapse Kamer van Koophandel en Nywerheid ondersteun die samewerking om die stad se paaie te herstel. Die kamer se uitvoerende hoof, Sharon Steyn, sê hulle ondersteun hierdie projek ten volle, hoewel hulle opgemerk het dat van die mense in die omgewing negatief daaroor is.

"Ek glo daar sal altyd negatiewe mense teenoor enige inisiatief wees," sê Steyn. Inwoners en ondernemings is gevra of hulle kan bydra om die projek 'n sukses te maak.

Steyn glo indien die gemeenskap nie saamstaan nie, gaan dit baie lank duur voordat dinge beter gaan raak. 

“Mense sal altyd sê hulle betaal tariewe en belasting, so hoekom moet hulle hierdie projek finansier?” sê sy. Steyn meen as die gemeenskappe nie saamstaan en dinge self doen nie, gaan dit lank duur voordat dinge beter gaan.

“Al wat ek aanhou sê, is wil jy ordentlike paaie hê? Wil jy ry sonder dat jou motor in 'n gat val wat groter is as Kimberley se groot gat? Indien wel, bied jou ondersteuning vir hierdie projek.” 

Dit is 'n samewerking tussen die kontrakteur, DF Marais, twee ondernemings, die kamer, en die Sol Plaatje Munisipaliteit.

Steyn steun Marais omdat sy glo hy is 'n uitstekende kontrakteur van die omgewing en ook omdat hy werk skep. “Marais vul nie net die slaggate nie, hy herstel die paaie weer. Hierdie projek is nie vir 'n sekere gebied in Kimberley nie, dit is vir die hele Kimberley, dus die naam 'Kimberley 4 Kimberley'. Elke gebied sal baat vind en dit sal die kans op beleggings verhoog.”

‘Al wat ek sê, is wil jy ordentlike paaie hê? Indien wel, bied jou ondersteuning vir hierdie inisiatief.’ 

“Die sukses van ‘Kimberley 4 Kimberley’ berus op die aktiewe deelname van ondernemings en inwoners. Die projek moedig plaaslike ondernemings en gemeenskapslede aan om by te dra tot 'n toegewyde fonds. Om die sukses daarvan te verseker, sal ondernemings en inwoners tot die fonds bydra, terwyl die munisipaliteit die nodige hulpbronne sal verskaf, insluitend teer en ander materiaal. Ek, as die aangestelde kontrakteur, sal die noodsaaklike taak van padherstelwerk en opgraderings behartig,” sê Marais .

OFM Nuus