Die Minister van Elektrisiteit in die Presidensie, Kgosientso Ramokgopa, het dié aankondiging Vrydag in Kaapstad gedoen.

Hy het aan die media gesê China was die eerste om te reageer op die samesprekings wat hy met die verteenwoordigers van verskeie lande gehad het om Suid-Afrika by te staan.

“Die Chinese is die eerstes wat na ons teruggekom het en gesê het ‘ons sal hierdie soort toerusting aan jou kan voorsien’. Daar is steeds probleme rondom kragopwekkers, die kwaliteit en die spesifikasie net om seker te maak dit is versoenbaar met ons eie vereistes. Hulle het na ons toe gekom. Hulle het vir ons die waarde van daardie bates gegee en ons sal bepaal waar hulle geïnstalleer sal word. Wat ons van ons kant af moet doen, sodra ons dit aanvaar, is dat wanneer hierdie bate aan jou behoort, moet jy daarna omsien.”

LEES OOK: Plans to reduce electricity demand

Ramokgopa sê die besprekings is nou rondom die doeaneregte en die belasting op die toerusting sodra dit vanaf China in Suid-Afrika land.

“Dit is 'n kwessie wat met die SAID se doeanes bespreek moet word, maar ek voorsien regtig nie dat daar 'n probleem sal wees nie. Dit is 'n toelae, so jy kan dit nie belas nie. Dis ’n toelae, iemand gee dit vir jou,” het die minister aan die media verduidelik.

Hierdie aankondiging deur Ramokgopa kom terwyl president Cyril Ramaphosa en minister van openbare ondernemings, Pravin Gordhan, die uitspraak in die hooggeregshof betwis dat skole, hospitale en polisiestasies van beurtkrag vrygestel moet word.

Ramokgopa het Vrydag weer beklemtoon dat die rooster eenvoudig geen vermoë het om dié instellings vry te stel nie.

OFM Nuus