Central SA
Eendekoor is Bloemfontein se trots in ATKV-Applous─── ELSABÉ DE JAGER 18:34 Sat, 10 Jun 2023
“My eendekoor maak my trots!” sê Werner Stander, koordirigent van die Primêre Meisieskool Oranje in Bloemfontein.
Maande se voorbereiding het tot groot hoogtes gelei. Oranje se junior koor is tydens die nasionale korekompetisie ATKV-Applous aangewys as een van die tien voorste junior kore in Suid-Afrika.
Die senior koor dring deur na ATKV-Applous se eindronde van Woensdag 26 tot Saterdag 29 Julie in Pretoria. Hulle kom die Woensdagaand aan die beurt wanneer die Sekondêre Meisieskool Oranje se koor ook sal optree. Stander dirigeer albei die primêre skool se kore, terwyl Maretha Steyn hulle begelei.
Eunice High School se koor Vitae Cantamus is gekies om Saterdagaand 29 Julie in die prestigeafdeling mee te ding. Foto: Facebook
Die enigste ander kore van Sentraal-Suid-Afrika wat uit die 227 inskrywings na die eindronde van 39 kore deurgedring het, is Willem Postma Primêre Skool (Bloemfontein), Laerskool Mooirivier (Potchefstroom) en Eunice High School (Bloemfontein), wat hulle die Saterdagaand in die geselskap bevind van die land se beste hoërskoolkore, soos Menlopark (Pretoria), DF Malan, Durbanville en Stellenberg (al drie Kaapstad) en die Afrikaanse Hoër Seun- en Meisieskoo; (Pretoria).
‘My stem kan vreemde dinge doen’
Die kreatiewe proses neem partykeer “vreemde en fantastiese” afdraaipaaie, sê die Bloemfonteinse kinderboekskrywer Jaco Jacobs, want ’n grappige rympie van hom het gegroei tot die junior koor se wenlied. “My stem kan vreemde dinge doen” is getoonset deur die komponis Franco Prinsloo.
’n Grappige rympie van Jaco Jacobs het die junior koor se wenlied geword. Foto: Facebook
Stander is deesdae voltyds koordirigent. Afgesien van die twee meisieskore van Oranje is hy ook betrokke by die Universiteit van die Vrystaat (UV) se Bloemfonteinkampuskoor en die Bloemfontein Children’s Choir. Hy is ook musiekdosent aan die Odeion-musiekskool van die UV.
Gevra oor sy verwysing na die “eendekoor”, vertel Stander drie eende pryk op Oranje se skoolwapen. Dié eende, wat nie agtertoe kan beweeg nie, is simbolies van die skoolleuse, “Vorentoe”.
Hy sê hy sien uit na nog ’n goeie pad vorentoe wat hy saam met sy eende gaan oopsing.
