Die vyf mans is Sondag in die vroeë oggendure in Maruping opgemerk. Hulle word verdink van die moord op ’n 42-jarige man.

In 'n gesamentlike operasie tussen die polisie en die blitspatrollie het hulle die verdagtes in ’n motor onder weg op die Mothibistad-pad opgemerk. 

Beamptes wou die verdagtes voorkeer, maar hulle het die polisie se bevele verontagsaam en weggejaag. Die polisie het hulle agternagesit.

’n Polisiebeampte het gesien hoe een van die passasiers iets wat lyk soos ’n vuurwapen op hulle rig, en ’n skietery het gevolg. Die verdagte se motor het tot stilstand gekom. 

Toe die polisie dit deurgesoek het, het hulle twee mense in die kattebak gevind wat vermoedelik die gesoekte moordverdagtes is. Een van hulle is beseer en is daarna in die hospitaal aan sy beserings dood. 

Die res sal binnekort in die landdroshof in Kuruman verskyn. 

OFM Nuus