Central SA
Gesteelde goedere behoort aan slagoffer van ontvoering; twee in hof─── 08:45 Mon, 10 Jul 2023
Twee verdagtes, ’n man (36) en ’n vrou (30), wat tydens ’n ondersoek na ’n beweerde ontvoering in hegtenis geneem is, sal na verwagting Maandag (10/7) in die Klerksdorp-landdroshof verskyn weens die onwettige besit van vermoedelik gesteelde goedere.
Die verdagtes is Vrydag (7/10) by 'n huis in Randlespark, Klerksdorp, in hegtenis geneem. Dit was nadat leidrade die ondersoekspan na die huis gelei het. Die span, wat bestaan het uit beamptes van verskeie polisiëringseenhede en private sekuriteitsmaatskappye, was besig om die ontvoering van Deon Nel (30) te ondersoek. Nel is na bewering op Donderdag (6/7) in Wolmaransstad ontvoer. Volgens inligting het Nel nie teruggekeer huis toe nie nadat hy 'n plaaslike kroeg besoek het. Hy is as vermis geregistreer, maar die saak is later na ontvoering verander nadat ’n losprys geëis is.
’n Soektog het gelei tot die inhegtenisneming van twee verdagtes nadat van Nel se besittings – 'n horlosie, klere, 'n hoed, bankkaarte, identiteitsdokument, asook 'n selfoon – in die huis gevind is. By verdere ondersoek is bloedvlekke in die huis gekry.
Intussen is ’n derde verdagte deur die polisie ondervra. Die ondersoek, insluitend die soektog na Nel en sy Mazda Drifter, duur voort.
