Die Valke in die Noord-Kaap het ’n waarnemende stasiebevelvoerder gearresteer weens beweerde diefstal ten bedrae van byna R300 000. Sy is egter borgtog van R4 000 toegestaan nadat sy Woensdag (6/9) vlugtig in die Springbok-landdroshof verskyn het.

Die provinsiale Valke-woordvoerder, Tebogo Thebe, het gesê Nomvula Jacobs, wat 'n luitenant-kolonel is, word daarvan aangekla dat sy 'n bedrag van R291 700 uit die stasie se kluis (SAP13) gesteel het, waar bewysstukke bewaar word.

Hy het gesê die bedrag bestaan uit R102 700 wat gekonfiskeer is in 'n voortgesette ondersoeksaak, die bedrag was veronderstel om in 'n kriminele bateherwinningsrekening (CARA) inbetaal te word nadat die hooggeregshof onlangs 'n bevel daaroor uitgereik het.

Thebe het gesê die saak teen haar is tot 2 Oktober 2023 uitgestel vir verdere ondersoek.

"Die balans van R189 000 is van ander sake wat nog hangende is. Die ondersoekspan het ná verskeie pogings om toegang tot die kluis te verkry, ontdek dat die sleutel vermis is. Die kluis is uiteindelik op Woensdag 30 Augustus 2023 oopgemaak, wat daartoe gelei het dat 'n saak van diefstal teen die waarnemende stasiebevelvoerder geopen is,” het hy gesê.

OFM Nuus het vroeër berig die Valke het voormalige staatsamptenare in hegtenis geneem op aantygings van bedrog en korrupsie.

Die Valke het onlangs nog 'n groep staatsamptenare en sakedirekteure gearresteer wat betrokke was by die tenderbedrog vir persoonlike beskermingstoerusting (PPE) ter waarde van miljoene rande.

Onder diegene wat in hegtenis geneem is, is 'n verdagte wat 'n rekenpligtige beampte van die provinsiale departement van gesondheid is. Die departement het 'n verlies van R17 miljoen gely weens die oortreding en twyfelagtige optrede.

OFM Nuus