Die onvolledige rioolstelsel of -pyp in dele van Botshabelo, in die Vrystaat, het gelei tot rioolstortings in en om dié woongebied.

Die DA se David Masoeu het gesê die half geïnstalleerde rioolpyp van een woongebied (Afdeling D) na ’n ander (Afdeling M) het tot rioolstortings in en om die plek gelei. Diegene wat die taak gehad het om te verseker dat huishoudings wat aan riool gekoppel is, afgehandel word, het misluk. Vir die finansiële jaar 2021/22 het die dienslewering en begrotingsimplementeringsplan 100 huishoudings geteiken.

Ná die mislukkings om dienste volgens die implementeringsplan te lewer, was die regstellende plan van aksie om die kontrak weer te adverteer. Vir die finansiële jaar 2022/23 het die implementeringsplan se teiken op 100 huishoudings gebly, en steeds is dit nie bereik nie. Vir die huidige boekjaar het die huishoudings van 100 tot 200 toegeneem, maar die eerste kwartaal het verloop sonder dat iets bereik is.

Die provinsie se rioolkrisis vererger. Foto verskaf

“Die haglike, lewensgevaarlike toestande waaraan inwoners voortdurend onderwerp word, het daartoe gelei dat sommige inwoners kla oor verswakte gesondheid, veral kinders wat moet grootword met hierdie rioolgevaar wat in die woongebied vloei.”

In die hoofstad van die provinsie, Bloemfontein, het die skoolhoof van Brandwag Primêr, André Venter, aan OFM Nuus gesê dat rou riool deur die strate van Brandwag, naby die skool, gevloei het. “Die rioolvuil in Brandwag is ’n nagmerrie en kinders loop elke dag daardeur. Die munisipaliteit het blykbaar nie 'n idee wat om te doen nie. Die stank wat hierdie kant toe vloei, is ’n gesondheidsrisiko vir ons kinders, veral die pre-primêre kinders.”

Die Welkom-gebaseerde Matjhabeng Plaaslike Munisipaliteit het bevestig dat hulle onder druk is weens die rioolstelsel wat ineenstort as gevolg van rommel wat in mangate gegooi word. Die Matjhabeng Plaaslike Munisipaliteit se kommunikasiebeampte, Thokozile Nkuna, het gesê die verstopte mangate dra geweldig by tot die reeds onderdrukte rioolstelsel, wat 'n negatiewe impak het soos gesien in alle wyke.

OFM Nuus