Central SA
Departement ondersoek Welkom-skool ná vuisgeveg─── TSHEHLA KOTELI 09:56 Fri, 08 Sep 2023
“Alle dade van swak dissipline, rassisme, misdadigheid, geweld en afknouery in ons skole word veroordeel.”
Die Vrystaatse Departement van Onderwys ondersoek bewerings van rassisme, afknouery en aanranding by die Hoër Tegniese Skool Welkom.
Howard Ndaba, departementele woordvoerder, sê ’n video is op sosiale media geplaas wat wys hoe drie leerders voor ’n onderwyseres in ’n vuisgeveg met twee ander seuns betrokke is. Na bewering was die onderwyseres bevooroordeeld teenoor een van die leerders. “Die departement veroordeel alle dade van swak dissipline, rassisme, misdadigheid, geweld en afknouery in ons skole.”
Die vyf seuns is deur die skool se dissiplinêre komitee skuldig bevind. Hul straf was om vir ’n paar dae die skool skoon te maak.
“Skoolveiligheid is ’n maatskaplike kwessie. Ons as ouers, leerders en ander belanghebbendes moet saamwerk om geweld by ons skole te voorkom."
Amptenare van die departement is na die skool gestuur en op grond van die bevindinge sal dissiplinêre stappe gedoen word. Berading word vir die betrokke leerders gebied.
