Die Suid-Afrikaanse Nasionale Weermag (SANW) sê vier van sy lede is dood in 'n ongeluk waarby twee Samil 50-voertuie betrokke was.

Die twee voertuie was Woensdag in 'n ongeluk ongeveer 90 km van Upington terwyl hulle op pad was na SA Army CTC vir die Vukuhlome-oefening.

Andries Mahapa, SANW-woordvoerder, het gesê een Samil-voertuig het 'n ander een gesleep toe die voorband van die voertuig wat gesleep word, gebars het. Dit het albei voertuie laat rol. “Vier soldate is uitgeslinger en ’n Samil het bo-op die lede geval,” sê Mahape.

“Twee lede is kritiek beseer en na die dr. Harry Surtie-hospitaal in Upington gehaas, nege lede met geringe beserings is ook na dié hospitaal geneem.

“Die families van die oorledenes is in kennis gestel en militêre kapelane en maatskaplike werkers bied ondersteuning aan die families.”

Een Samil-voertuig het 'n ander een gesleep toe die voorband van die voertuig wat gesleep word, gebars het. Dit het albei voertuie laat rol.

Die tragiese ongeluk het op dieselfde dag gebeur as die fratsvoorval wat die lewens van minstens drie SA Vlootduikers geëis het nadat hulle in onstuimige water naby Kaapstad van hul duikboot meegesleur is.

Die voorval het aan die kus van die dorpie Kommetjie plaasgevind toe 'n weermagduikboot op pad na Kaapstad 'n hervulling op die see uitgevoer het.

"Hierdie voorval dien as 'n somber herinnering aan die risiko's wat ons toegewyde dienspligtiges en diensvroue daagliks in die gesig staar in hul onwrikbare verbintenis om ons nasie te verdedig," het Pikkie Greeff, nasionale sekretaris van die Suid-Afrikaanse Nasionale Verdedigingsunie, gesê.

“Ons gedagtes en meegevoel gaan uit na die families en geliefdes van diegene wat hul lewens verloor het, en ons betuig ons innige simpatie aan die beseerde personeel en hul families terwyl hulle hierdie uitdagende tyd verduur.”

OFM Nuus