Nolan Marais (20 maande) van Vanderbijlpark by wie ernstige hidrokefalie gediagnoseer is, herstel goed ná 'n breinoperasie.

Sy ma,  Jessica, sê Nolan het skielik deur die nag begin slaap twee weke ná sy operasie, iets wat hy nooit voorheen gedoen het nie.

"Hy kan nou tel tot by vyf, terwyl hy vantevore slegs tot drie kon tel, en hy ken amper al sy kleure. Voorheen kon hy slegs agt kleure identifiseer," sê Marais.

Hy kan nou balanseer op sy knieë, iets wat hy voorheen nie kon doen nie. Hy neem ook twee tree van die bed na die kot sonder hulp.

Nolan Marais is reeds vroeg soggens op sy trampolien. Foto verskaf

"Hy het 'n ongelooflike hoeveelheid energie en beweeg baie vinnig. Hy staan gewoonlik reg voor die televisie en kyk na prente, maar nou sit hy ver van die televisie op die mat," sê sy.

OFM Nuus het vroeër berig Nolan se ouers het besef dat sy balans nie goed is nie. Hulle het hom na die dokter geneem vir verdere ondersoeke. Dit was toe dat hulle ontdek het dat hy ernstige hidrokefalie het en dat die siste op sy brein verdubbel het. Sy ouers was hoopvol ná sy breinoperasie.

Marais vertel dat hy nou meer woorde sê en nie meer bang is om van 'n staande posisie te gaan sit nie. Sy beentjies het voorheen vreeslik gebewe wanneer hy gaan sit het, maar nou sit hy sonder enige probleme.

Nolan Marais se ma sê hy het skielik deur die nag begin slaap twee weke ná sy operasie. Foto verskaf

"Hy probeer nou self staan sonder om aan iets vas te hou, hoewel hy nog ’n bietjie sukkel. Hy het ook sedert die operasie  ’n hele kilogram gewig opgetel.

"My kind is nou ’n heel ander kind. Hy is die gelukkigste seuntjie en wil net buite speel. Voorheen wou hy nooit werklik buite wees nie, maar nou is dit ’n stryd vir my om hom binne te hou. Hy is soms al buite besig op sy trampolien voor 07:00," sê Marais.

Dit kan tot vier maande duur voordat sy brein volledig herstel. "Ons hoop dat hy selfstandig sal kan loop voor sy tweede verjaardag."  

OFM Nuus/Heidré Malgas